「借我一點你的時光，許我一點美好難忘。」

黯沉的陳韻如做主道，開朗的黃雨萱困在身體小屋裡。

莫俊傑及李子維都知道是假裝的黃雨萱。

再一次看"想見你"，再加深明白了這劇想帶出的意思，

。小時候，不難發現，自己好像找不到自已存在的價值
。繼而會問人生是否不停的要找到價值？
。幸運的人會知道，開不了心不是錯
。長大後，受過大教訓，才驚覺太開心，也許是錯
。原來開朗陽光不一定最好，沉穩冷靜也會有愛你的人
。明白不是我不想開朗，而是我本來如此
。最後不能勉強，只需要一次機會

不能信任...

如果屋企的人都不能信任...
還會對自已做成傷害...
那應該怎麼面對。
在家裡都會有危險...
以為最安全都避風港都沒有了..
人生還可以怎樣?

雖然不是相熟的友人...
但一場相識...好希望事情有辦法...
問題已經發生了，不希望再惡化就好。
願一切安好!

對話: 談往事．潑水

友人: 我個朋友一講八卦野就即刻病好
友人: 一無就再病返
我: 下?!
友人: 岩岩講我之前EX D野俾佢知，佢個人即刻勁精神，係咁話我要聽我要聽
我: 有咩佢唔知既呢?! (大家已經無所不談了!)
友人: 講之前有個EX潑我水單野
我: 咁誇張...(話時話，潑水呢家野，我好細個好像現場目擊過一次，有機會再談談先)
友人: 你無聽過？？
我: 潑水無聽過bor （一聽潑水就知道係激動野啦！！！講過一定記得，唔記得，姐係無講，一定要聽！）
友人: 好耐架喇，有一次成班FD去BBQ啦，咁我個EX同佢個女仔FD玩緊，佢個FD就話要摸佢個胸，咁佢就避啦，然後叫我救佢，咁我見佢玩就廢事加入戰團同埋我又見佢笑住，無理佢，咁佢地玩完，我個EX無啦啦倒水落隻杯，我個陣都好奇怪，因為我個EX唔飲水，但諗緊個陣佢已經成杯水潑左埋黎，然後話，你係咪我BF黎，你做咩唔救我，我個陣即刻著左，手上面我都唔記得拎住左咩，一野扔左落地，個樣野爆左，之後拎埋袋即刻衝去巴士站走

我: 哇~~呢個係港女黎架喎！！！！（當時好想說：飛左佢啦！已收左口，當時人是馮少爺的話，我一定說。）
友人: 哈哈，不過好耐喇，中五岩岩畢業
我: 呢件事之後你飛左佢？！？！
友人: 無幾耐之後就散左

這段對話給我的感覺是，人愈來愈大，聽到的真實事情會愈多。一個人的容忍度與包容度是有限的，（這位友人，做事好有分串，而且不會亂說話，也好懂看風頭火勢的，都中招了！？！）而且，每個人都有底線，對著不同人，有著不同高低之分，有些話有些事，知道對方不喜愛的時候，要找個適當的處理方法。因為有時候觸及了底線，大家會各不相讓，真的會一發不可以收拾。

同學的搭飛機之旅。

早前，聽過一位同學阿J的事績，又忍不住分享一下。話說當時，有一位女孩子，邀請阿J與她一同外遊，嗱嗱嗱。當時是沒有太多的交涉的，但阿J應承了這次要搭飛機之旅。我與夏小姐(大學同學)，一同審問他，審問了許許多多的資料。原來，他們四晚.......都只是攬住一起睡。當時我與夏小姐，都不停問過究竟，實在太奇怪了，一個女孩子，與你單獨去旅行，還要是五日四夜!!正如我以前所說，（就算本身是兩張床，張床都會自己拍埋啦），有好多事都唔簡單的。而且他們每晚都只是"睡"在同一張床。。。？？

夏小姐: 無可能架喎!! 佢撩得你去旅行，邊可能無野姐!
阿J: 我當時真係無諗呀!
夏小姐: 如果第一日你怕尷尬唔出開口，最尾果日都應該發功!
阿J: 咁我覺得唔知點咁丫嘛!!
夏小姐: 你地仲要沖涼房都玻璃門喎!
阿J: 中間磨沙，睇唔到架!
夏小姐: 你無行過果邊，扮路過咩，目及下野都要啦！！！（我只在旁邊聽，沒有插咀，都笑死我）
阿J: 無端端做咩走過去！！宜家識，當時唔識丫嘛！
夏小姐: 無鬼用架，佢當時有無俾個指示你，叫你拎下毛巾俾佢咁呀？
阿J:　痴線架咩！
夏小姐: 哎呀！！！點會咁架你！！
阿J:．．．．．．
（他們一路說，我一路笑）

然後，又與高先生談論了這個話題。

我: 佢地真係攬住訓交咋!!
高先生: 點可能咩都無發生過，我唔係好信囉!!
我: 唔係呀，我地都問得好details
高先生: 邊有可能攬住訓會無野發生
我: 當時係好細個，所以無諗呢樣野，又係正常丫
高先生: 我絕對懷疑阿J唔係一個正常既男仔，一係佢係不舉，一係就講大話
我: 我都唔知呀，不過阿J又係既，個人係你身邊，你做咩都得架啦，佢當時太猶豫喇
高先生: 咁咪係囉，真係夜戰連連，幾日都唔使出房門，哈哈
我: 哈哈哈，咁佢正直姐!!呢單野又真係幾爆，我同夏小姐都聽到哇哇聲....
高先生: 哈哈，我覺得ON直多過正直
我: 哈哈，佢當時係小朋友來架嘛....
高先生: 可能我大個得太快，^^
我: 你經驗老到添啦...哈哈
高先生: 我好乖架，我同我D EX都係PURE LOVE黎既，;)
我: 你知唔知呢，我對住個moon 笑左出黎呀....??（好大個大話，笑死我!!）
高先生: 無啊，眼神不之幾誠懇同堅定，^^
我: 其實呢...你係咪記錯左 Pure Love既definition 呀?
高先生: 哈哈，無啊，我呢D唔信教既仲純潔過d信教，一睇我個樣就知啦
我: 咳咳，你拍過咁多次拖，你都係Pure Love，你應該仲on直過阿J噃。
高先生: 我個人純潔啊嘛，^^
我: 我想將啲對話放上FB..
高先生: 咁你又唔好咁做，我個人低調開你都知架MA，咁做太浮誇喇

(嗯，我沒有放在FB，只放在這裡而已!)
究竟一對男女單獨去旅行，沒有事發生，是正常還是不正常呢？
不過，阿J這次的旅行又真的幾盪氣迴長，令人好難忘呢。

一段八掛新聞

早前聽說過一段八掛新聞，有關以前的一位朋友的。

事源：朋友Ｈ與同學Ｋ，很多年前他們是一對情侶，想當年好恩愛的。而且，見證他們經歷了許許多多才一起，然後一直都恩恩愛愛的。看著他們在一起，吵架、家人反對、冷戰、家人接受、再在一起等等．．．．之間發生很多事，但最後，一段很短的時間後，分開了。聽說，原因很簡單，男方愛上了另一位，女方很不奮，挽回不果後，分手收場！！　最後，各不相干。女方由那時開始恨男方，無論經過多小段感情後，都一直恨對方。

在近這一陣子，我聽說到男方與女方身邊的密友相遇。與女方身邊的密友說，自己一路還是喜歡女方的，但奈何他不會現在找她，等待日後有更好的事業時，才會這樣做。我聽到過，第一個反應是！（沒有可能！！！完全不可信！！！）　
嗯，今天在男方的社交網站，看到了結果！我沒有猜錯！！！

美其名是說會等待自己有能力才找對方，實情是滿口謊言，吹得就吹。
怪不得女方到現在還那麼恨他！真的很賤！！
不是真心真意，也不要無知地與別人透露出你是虛情假義。

休閒．嘆茶．淒美的愛情故事主角

是日放假，休休閒閒的。先與父親去吃個早餐，其後再去行個街，好耐都未試過休閒，不像以前番學的日子，日日番學等放學，然後趕番兼職。來年應該不可以了?
昨天聽班主任說，不要做太多兼職，搵夠車錢與吃飯錢好了，連唱k的錢都不用賺了，因為來年你將會用short cut的方法來拿一個degree，你好好想一想你有否空閒時間去唱下k啦（咪嚇我啦！！唉！）我好想好好享受我的短短短暫大學生活喎！？

說回正題，下午茶時段與辰生去左嘆茶（外面還有夕陽的景色？）！！他相識滿天下，周圍都是豬朋狗友，可以帶我到朋友的地頭免費的嘆茶。聽聞呢位朋友，有一段好淒美！的愛情故事，而且是非常錯綜複雜又無可奈何的（即是看TVB劇集，進退兩難果種呢！）一直都想見見他的真人架喇（我聽呢段新聞時，好曲折離奇，好激架！雖然我不認識內裏的主角），今次終於都有機會了。在我幻想中，他應是好粗魯（！）、無禮貌（我估！）、唔講道理、好矮與不靚仔的（以上種種是我自己虛構的，好明顯是有偏見。）哇！今日一見，他的朋友與我幻想的是全部相反的，好酷！有禮貌？！串串貢就緊架喇（做辰生的朋友必定要串串貢！）而且重點係幾靚仔架喎！！最緊要係沖杯野飲好飲（雖然大型連鎖咖啡店杯杯都好似差唔多！）我的重點是想說，呢位朋友，應該條件唔差架？又何解會咁執著既呢？又何解會苦陷一段沒結果的感情呢？而且，我覺得他應該唔會輸蝕架喎（只是我的直覺告訴我！沒有理據可言！），但偏偏現實就是相反，唉，好唏噓呀！

下次又再去先嘆茶先。

畫室的一事

在畫室裏，常遇到各式各樣的人，有的不作聲、有的跟我談得甚歡、有的會靜靜的聽一會兒間中加一句表示她/他也在八掛中，不是要深入認識，彼此可以互不認識但會共處一起創作或努力，這很奇妙。

之前，聽了在畫室一位阿姨的經歷，想記下來，遲遲沒有著手，今晚又想起了，要記下。一開始見到這位阿姨，以為她是傻的，因為做什麼都是大笑一餐，好少好少的事都只有笑，我不太會跟她交談。聽C.K.說，她真的好有趣架，你遲啲就知架喇。直至有一個週末，我們好像談及兩個人的相處真的好奇妙之類的話題，又說到宜家呢個年代婚姻都可以好化學的。她又有一番見解(聽C.K說，她的見解一向都好獨到)。
她說: 有時一段婚姻好唔好，都好睇你有無人照住架!
眾人:(下...不明白喎!?) 婚姻不是兩個人的事嗎?
她: 當然唔係啦!!
眾人: 咁係點呢?
她: 仲要睇埋男方既媽媽like唔like你架....
我: 又係喎..呢個我認同...
她: 緊係啦，佢鍾意你，可以唔俾個仔同你離婚添呀...
我: 又岩喎!!!奶奶撐住你喎..
她: 係架...留唔住個男人都有人幫你教訓佢丫...
眾人: (笑笑笑...) 你好似試過咁既?
她: 係呀!我就係試過咁..
眾人: ！！？！！？？？
她又繼續說：　我以前個男友，去到就快結婚架喇．．．係結婚前佢帶我去見佢阿媽，講開佢阿媽原來係二奶，我好似話過佢。佢其後咪唔鍾意我囉！都就快結婚架啦，最後可能就係因為我話過佢阿媽係二奶，最後結唔成婚，佢唔要我囉．．．．哈哈哈！！
眾人：（沒有給意見）
她：所以對住奶奶要小心啲呀！唔可以得罪架！隨時因為佢而結唔到婚架．．．

聽了後，有一點傷感。雖然當時人說出來好像一件普通事一樣，但聽下去，好唏噓的感覺。為何兩個人的一生的承諾會因為外在的人而影響到？那代表他不是正確的那位嗎？又，我估不到這位阿姨有這種的經歷，因為在她的面上、說話上、感覺上，一點點傷感或痕跡都沒有。我問C.K:(點解佢講得咁搞笑既可以?) 他說: 一個人過左咁耐既事，佢都仲咁記得。咁記得既，只有兩種事一種係開心，一種係唔開心。好明顯呢件係唔開心，只係過左咁耐，再講番已經無咁大反應姐。

故事說完了....
嗯，當中包含著一點點的道理。

斷左呀！

說故事時間。

前一陣子，聽回某位說馮少爺以前踢波的瘀事，真的勁搞笑。要節錄下來，分享分享先。

馮少爺: 唔掂呀!真係好痛。
某位: 無事架。
馮少爺: 堅痛喎!
某位: 痛係正常丫。
馮少爺: 我要call白車去醫院，我諗斷左腳。
某位: 咩料呀你..
馮少爺: 真架，你快啲黎啦！
某位: (狂笑...)

真的call左白車到醫院。
醫生說:小朋友你條根拉親，無咩事既。唔洗擔心！！！
（我聽到呢度已經笑到呢．．．淨係想講：你個死白痴仔！）
他的家人見他說到那麼嚴重，趕快到了醫院看他。
馮姐姐: 你咩料呀？拉親條根call白車? 仲要叫我黎?
馮少爺: 好痛丫嘛!
某位: (狂笑...)

說完。
馮少爺，你的事跡又真係幾"經典"既。

不要斜揹袋

今早腦海裏又浮現以前聽過的一件事，本著想寫就寫的心態，就記下來。
不過，我會盡力的做到不影響別人為大前提。

讀書時代，有一位志同道合(意思是大家都好八掛的，明哂啦！)的朋友仔，叫住Y小姐先啦! 聽那個故事的時候，我好像是單身的。自己沒事沒幹，當然找其他人的事來聽聽啦，而Y小姐又樂意說的(記住呀!我沒有迫人說的)，我必然會坐定定的聽。
話說那時身材不錯的Y小姐與她的(前度?舊?)男友都一起了一段日子了，當然關係都相當恩愛的，在我言而那位小姐是相當貼身(是指:起床一電話、午飯一電話、放工一電話，說多幾萬次"我愛你"都嫌小的，多說老婆豬幾句就最perfect「以往我在她身邊聽她與男友的事，會好想打爆她的頭，因為她真的肉麻到呢！！」，但現在看來她已經改變了不少)。有次她細說一件小事，但這事對聽的我來說都幾深刻的，過了幾年都好記得。

有一次我問她，
我: 果個xxx b.既斜揹袋真係唔錯喎。
Y小姐: 係架..但我唔會揹斜揹袋囉!
我: 點解既...你唔鍾意咩斜揹袋?
Y小姐: 唔係呀!有啲原因架..
我: 下，咩事呢?
Y小姐: 我男友唔俾！
我: 下？？！揹斜揹袋都唔俾．．咩世界先？有咩問題呢？

當時我聽到的第一個反應就是「有無搞錯呀？點會有人咁霸道架？」，然後Y小姐又繼續跟我說，「係呀!我初初都好唔明點解喎」。咦，這個說法，即是有其他原因啦，我就想聽聽那是究竟是什麼原因呢?

原來，她的男友就知道當Y小姐揹斜揹袋時，會因為斜揹袋會令她美好的身材表露無遺！！！她男友就是知道有這個問題，但就只叫Y小姐不要再揹斜揹袋，心態是以免被人望蝕哂。Y小姐好像一直都不知道，直至有一次問她的男友，男友說明白這個原因才真相大白。
嘩...所以我認我當後知後覺的。
我真的想不到是這個原因喎?好像好多人都是這樣的。
不知道原因前，在我個人看來，真的問題不大。
但聽到解釋了，整件事都變為貼心、關心與窩心的行為。
起碼，我笑著跟Y小姐說:「你幸福啦，咁鬼肉緊你！驚死你俾人望蝕喇!」。
而只對男友斯文的Y小姐只是甜絲絲的笑著。

嘩，揹斜揹袋姐。當時都好像令我悟了一個大道理，而且真的好搞笑。

-----

而我跟過一個人說這個故事，我說到一半，
那人說:「我明喎!」。
我說:「嘩...有無咁勁先?」
那人說:「係呀!好簡單姐。」

嗯，到了最後，那人真的可以說出原因。
我要做的結論是，「他們是同一類人，一樣是貼心的人!」。